Callum Hudson-Odoi Nih Hlawhtling Mi Zanglek Thiam Asi Nak Dingah Zeidah Tuah A Herh Ti Mi Ruahnak Hazard A Cheuh

Callum Hudson-Odoi Nih Hlawhtling Mi Zanglek Thiam Asi Nak Dingah Zeidah Tuah A Herh Ti Mi Ruahnak Hazard A Cheuh

Chelsea mino te zanglek celh thiam Callum Hudson-Odoi hi aluancia zarh ah Brighton he an chuihnak ah premier league ah avoi khatnak first lineup ah ai tel asi. Cu an chuihnak ah a ke zong a chuak ngaingai, cu pin ah Giroud nih goal a khumh mi zong Callum Hudson-Odoi goal kho dingin a tuah piak mi asi.

Callum Hudson-Odoi hi premier league si lo mi ah a chuih mi zoh tikah a ke zong a chuak ngai tawn mi asi. A hnubik Europa league puai 3 an chuih mi zongah a puai 3 ning in goal a khumh khotu asi. Cu tikah Chelsea țanhtu pawl nih an uar ngaingai mi zanglek celh thiam asi.

Brighton he an chuih lio ah Callum Hudson-Odoi cu a ke a chuak ngaingai, cu tikah chelsea coach Sarri telh in chelsea țanhtu hna nih an thangțhat ngaingai. Cu pin ah kum 2020 Europe chuih dingmi ke hneksaknak ah avoi khatnak England selected ah ai tal ve mi asi.

Chelsea zanglek celh thiam Hazard nih Callum Hudson-Odoi i a pumpululh chuih ning he pehtlai in a thangțhat ngaingai, cu pi ah hlawhtling mi zanglek celh thiam mi pakhat si nak dingah tangdor tein um le i uah lo tein um ii fakpi in i zuam a hau tiah forhfialnak bia a chim.

Hazard nih a chim rih mi cu “Callum Hudson-Odoi hi Brighton he kan chuih hlan ah first lineup ah i tal dingin ai ruahchan ngaingai, tu cu caan hman tein first lineup ah chuih dingin ready asi cang. Callum Hudson-Odoi nih zeitin dah pumpululh a chuih le aa hlen hna ti mi țha tein nan hmuh ko cang. A nih hi a mah le a mah zumh ngam nak zong a ngei pin ah zanglek celh a thiam ngaingai mi mino te asi.”

Callum Hudson-Odoi hi mino te asi caah hi nak in a thiam chin lengmang rih lai. Kei mah nih a ke a chuah chinchin khawhnak dingah zei hmanh ruahnak ka pek bal mi a um lo. A nih hi kan mah he hmunkhat te ah training a tuah lengmang mi asi. Asinain Callum Hudson-Odoi lei nih ruahnak a ka hal asi ahcun a țhabik in pek kai tim. Asinain a nih cu a thiam ngaingai mi zanglek celh thiam a si cang ko.

Callum Hudson-Odoi cu a kum a no rih caah zei bantuk puai poah ah chuih a duh lio te asi. A caan caan ah caanțha a ngei mi chungin a țhabik in a chuih khawh caan a um lai, a caan ah a ke a chuah lo caan zong a um lai. Asinain a țhabik mi pakhat cu tangdor te in um le i uah lo tein fakpi in ai zuam ding hi asi. A nih cu a kum a no rih i minute 90 chung hmanh ah duh chung in a thli kho rih, kan nih cu kum 28 upat lei sang kan si cang i, a caan a dongh lei hna ahcun kan tha hna a ba deuh ngai cang i duh ning hmanh in kan chuih kho ti lo.  ”

Callum Hudson-Odoi cu club a țha mi pakhat ah zanglek ai celh cang mi asi i, a caah cawn dingmi tampi a um rih. Keimah nih Callum Hudson-Odoi sin ah ka chim lengmang mi cu hlawhtling mi zanglek celh thiam pakhat si ahcun tuah a herh mi cu tangdor le i uah lo tein i zuam hi asi. Training tuahnak zongah i zuam, cu nai zuam nak cu chuih taktak tikah a tak in nai zuam nak kha langhter (goal hna shot), cun nuam tein pumpululh chuih ding hi a biapi taktak mi asi” tiah Hazard nih Callum Hudson-Odoi cu a ti.

“Ka nu le ka pa nih an ka chim lengmang mi cu ‘i uah lo tein fakpi in i zuam’ tiah an ka ti. Pumpululh ti mi cu rang taktak in thil hi a cang theo tawn. Thlahnih thum hna na ke a chuak taktak si ahcun na minthang cawlh lai, cu ve bantuk in hi hnu thlahnih thum zongah na min a chia kho cawlh mi asi” tiah Hazard nih a ti.

SPORTS MYANMAR

Be the first to comment on "Callum Hudson-Odoi Nih Hlawhtling Mi Zanglek Thiam Asi Nak Dingah Zeidah Tuah A Herh Ti Mi Ruahnak Hazard A Cheuh"

Leave a comment

Your email address will not be published.


*