Zeitluk In Dah Theihthiamnak Nun Hi Abiapit

Zeitluk In Dah Theihthiamnak Nun Hi Abiapit

Theihthiamnak timi biafang hi a sunglawi taktak mi le a thuk taktak mi bia asi. Cu theihthiamnak biafang cu minung kan nunnak ahzeitluk in dah a biapit tiah cun………..

“Theihthiamnak timi biafang hi zeitluk in dah a sunglawi tiah cun, sungzatlak nak pakhat ton khawh mi hmanh kha “theihthiamnak” nih a chanhchuah khawhter tu asi, cu bantuk thiamthiam in midang nih kan cungah duhnak lungthin (interest) an ngeih lo hmanh ah kan si ah ra kho dingin “theihthiamnak” nih a tuah khawh mi asi.”

Duh dawtnak timi hmanh hi “theihthiamnak” ai tel lo ahcun zeitik caan paoh ah a rawk kho mi asi bantuk in Duh dawtnak ai tel lo hmanh ah pakhat le pakhat i “theihthiamnak” ahcun, cu bantuk nih tlaihchannak kha a fekmi pehtlaihnak a chuahter kho deuh tu asi.

Minung cheukhat nih cheukhat minung cu “theihthiamnak” awk zongah ai tlak lo tiah chim lengmang theu asi. Asinain “theihthiamnak” he ai tlak le tlak lo zongah siseh kan mah “theihthiamnak” kan ngeih ding kha cu kan rian asi i, midang nih cu bantuk “theihthiamnak” kan ngeih mi an sunglawih le sunglawih lo cu an mah rian kha asi ko.

Vawlei cungah duh a nung cem mi minung hi muidawhcem zong asi lo, “theihthiamnak” sangpi a ngei mi minung hna kha vawlei cungah duh a nungcem mi le mi nih tlaihchan cem mi an si ko. A ruang cu thatnak in thil a hmuh pin ah mi ngeihthiam khawhnak a ngeihter tu cu “theihthiamnak” kha asi i, cu bantuk minung hna cu dawttu zong tampi an ngeih pin ah tlaihchantu zong tampi an ngei.

“Theihthiamnak” nun a ngeihmi a sang/a niam timi cu minung kan thinlung put he ai pehtlai mi asi i, kan tuarnak, kan khuaruahnak le hmuhton mi hna nih thazang an pek mi kha asi.

Milungpuam paohpaoh hna sin ah “theihthiamnak” timi hi a tlawm ngai, mi zawnruahnak a ngeih lo mi hna sin zongah cu thiamthiam cu asi i, cu bantuk minung hna nih midang sinah “theihthiamnak” le thazang peknak an ngeih tuk lem lo.

Minung na si bantuk in minung nih ngeihmi duh dawtnak bantuk in midang zong kha va dawt hna, inn chungkhar ah siseh, hawikom kar ah siseh pehtlaihnak a fehter tu bik cu “Theihthiamnak” hi asi. “theihthiamnak” nun ngeih hnu lawngah pakhat le pakhat i dawt le i tlaihchan khawh asi, cu pin ah pakhat le pakhat kar ah palhnak a um hmanh ah zawn i ruah khawh asi,

A Caan ahcun

“Theihthiamnak” timi hi va pakhat bantuk asi, khatlei nih theihthiamnak zeitluk hmanh in pek sehlaw khatlei a thla a kiah si ahcun timhnak phak khawh a har ngaingai mi asi ve.”

Vawlei Cungah

“theihthiamnak” hi minung pumpak pakhat cio kan chungah um peng kho sehlaw, kan vawleipi hi a daituk hnga i, a nuam zong a nuam tuk hnga, asinain pakhat le pakhat kar ah siseh, khuakhat le khuakhat kar ah buainak le i rem lo nak a um lengmang nak a ruang cu “theihthiamnak” taktak kan ngei khawh lo ruangah asi.”

Cu ruangah “Theih….Thiam….Nak” timi biafang pathum hi kan nunnak ah kan ngeihkhawh ding hi a biapi taktak mi asi, cu “theihthiamnak” nun kan ngeih ahcun a rawkcia mi pehtlaihnak hmanh kha a remh kho than tu asi lai.

Kan Nunnak ah Theihthiamnak in kar hlang i zuam cio hna usih tiah sawmbu in ka ca ka donghter…

 

Be the first to comment on "Zeitluk In Dah Theihthiamnak Nun Hi Abiapit"

Leave a comment

Your email address will not be published.


*


Secured By miniOrange