Salai CeuBikThawng nih “Chin Miphun Ni” kongah a lungfahnak a langhter

Zeitik dah mahte khuakhannak kan ngah te hnga?

 

# Hmasa bik ah tutan ‘Chin Miphun Ni’ tawlrelnak ah rethei thabami Thantlang khua upa hna le mipi nan dihlak upat kan pek hna. Nizan ah Thantlang ka phan i nan cawlcanghnak le pumpeknak tampi ka hmuh caah kan lawmh tuk hna. A bik in, CNF biachimnak an ngah khawh nakding caah Yangon tiang kal in nan chimrelnak Bawipa nih a tlamtlinter caah kan lung ai lawm.

 


 

# Amahbelte, lung cu a fak hringhran ko. Zeitik ahkhin dah kan Miphun Ni (CND) hi Kawl bawi pawl hnatlaknak lak hau loin, zalong tein le diriam tein kan tuah khawh ve te hnga? Zeitikah dah agenda hna hi kanmah duh tein kan suai khawh ve te hnga? Zeitikah dah Chin Miphun Ni hi Chinram ah zungkhar ni (public holiday) ah kan ser khawh ve te hnga? Laica hmanh in kan tial kho rih lo si kaw.

#Falam Civuipi in aa semmi CND timi a muru cu ‘Chin miphun nih kanmah tein uknakphung (political system) kan ithim ni a si. Feudal (chieftainship) system hlawt in democracy system kan ithim ni a si. Cucu miphun mahte khuakhannak nawl kan timi ‘the right to self-determination’ cu a si. Mirang kut in kan luat ni menmen asi lo, ramukphung kan hlawt ni menmen asi lo, democracy kan ngah ni menmen asi lo hih. A muru le a thlarau(the essence and spirit) taktak cu miphun mahte khuakhannak(self-determiantion) kan ngah ni a si. Mirang kut in Kawl kut ah kan miphun covo a sungh hlante, can tawite, caankarlak chung mahte kan rak ngah nican a si. (Federal timi hi self-determination chung i pakhat men a si)

 

 

 

#Cucaah CND a muru le a thlarau hi philh hlah usih, cawhpolh hlah usih. Bawi don ni men a si lo. Sa ei ni men asi lo. Lai thuam hmuhsak ni le laamkui ni menmen asi lo. Khuaram thanchonak (development) lamsialnak menmen asi lo. Kha pawl nihkhan phen hlah seh, vaivuanh hlah seh.

#Miphun ah a zawmi kan si hih. Kan him lo. Mahte khuakhannak khua kan khirh than khawhlo ahcun tuhnu kum 50 ah kan tlau lan lai—afiang ko. Kan dothlennak lam canceo lawng kan kal rih hih. Miphun ah kan tum ruh usih. Thanchonak le zeimaw supsap menmen nih fawituk in kan lungawiter hlah seh. Kan lungmawnter hlah seh.

 

# Tuan Thantlang tuah dingmi CND hi hlunghlai ko seh. Mahbelte– Ramhunbawi pawl tampi an rat ruangah, mawtaw tampi a rak tlun ruangah, ur-er ruangah,kan diriam menmen hlah seh. Miphun Ni canhmangtu (agenda) hmanh mahte biakhiahnak nawl a ngei rih lomi miphun kan si i Miphun Ni hmanh mahle faiceukulh ah zungkhar ni ah a ser kho rih lomi miphun— a luat lomi miphun— kan si rih, timi thei bu tein (lungfak buin) CND hi hmang hna usih.

 


Credit : Salai CeuBikThawng–000—

Be the first to comment on "Salai CeuBikThawng nih “Chin Miphun Ni” kongah a lungfahnak a langhter"

Leave a comment

Your email address will not be published.


*


Secured By miniOrange