Dr. Aung Myint Thang nih “Holhtheihlo” asi khawh lonak fiang ngaiin a langhter than

 

Miphun vialte holh in ka hei holh kho ko hnga i vanmi holh zong khin kan hei holh kho ko hnga (1 Kor. 13: 1)

1. Vanimi nihhin holh an ngeih ve. Cucaah Paul zongnih vanmi holh zong khin ka hei holh kho ko hna tiah a ti nak asi. “Miphun holh vialte khin ka hei holh kho ko hna i vanmi holh zong khin ka hei holh kha ko hnga” ati caah vawlei cung i miphun holh vialte lakah vanmi holh hi ai tel loh tinak asi. Vawlei ah kan hman lomi vancung ah vanmi hna nih an hmanmi holh khi phun dang te a um tinak asi.

 

 

2. Paul hi vanmi holh in a holh bal lo. Paul nihcun nanmah nakin tam deuh holh dang in ka holh cang (I lehpalhmi Lai baibal ahcun holhtheihlo) a ti ko nain (1 Kor. 14: 18) “vanmi holh zong hin ka holh kho ko hnga” a ti tikah Paul nihhin vanmi holh hin a holh bal bak lo ti cu a fiang.

3. Cucaah Paul nih hawi dang nakin holh dang (I leh palhmi Lai Baibala hcun holhtheihlo) hin kha lio zumtu hna nakkhan a rak holh deuh ko nain Thiang Thlarau bomhnak thawngin a rak holh khawhmi holh vialte lakah khan vanmi holh ai tel lo tinak asi. Zeicatiah “vanmi holh hmanh khin la hei holh kho ko hnga” ti cu a holh bal lo tinak asi.

 

 

4. Cun “vanmi holh hmanh khin ka hei holh ko hnga” timi biafang nihhin vanmi holh hin holh khawh asi ko tinak asi lo. Bianabia ah Jesuh nih, “Vawlei pumpi hi minung pakhat nih a ngeih dih ko hnga, asinain a thlarau a sungh ahcun zeidah a tthahenm (Matt. 16: 26)” tiah a ti i vawleicung pumpi hi pakhat nih a ngeih khawh taktak ko lai tinak asi lo. “Hei si sehlaw” tinak sawhsawh, ngeih khawh lo ding khi va ngei hmanh sehlaw tinak khi a si. “Miphun vialte holh zong ka he holh dih ko hnga” timi zong hi India ram lawng ah holh phun hi 700 renglo a um i vawlei cung holh phun hi thiam dih, holh dih khawh asi lo. “Hei si hmanh selaw” tinak sawhsawh khi a si.

5. Holhtheihlo hi vanmi holh cu va si sehlaw vanmi sinah pei Pathian nan thangtthat i nan hman ding asi hnga cu. vanmi holh a thiam lomi, vawlei minung, sin i vanmi holh nan hman lenmi hi nan hruh bia asi lo maw? Pathian nihcun minung holh cu a thiam dih ko cuteh, zeidah vanmi holh theng i Pathian va tthangtthat cu a herh khun. Nan holhtheihlo hi vanmi holh cu va si hmanh sehlaw, vanmi holh in “Bawipa! Kai lawm” ti khi vanmi holh cun zeitindah nan chim? Cu hmanh na chim khawh lo ah “zei dang bia thil vilate khi zeitindah vanmi sinah cun vanmi holh cun na chim ne hnga?”

6. Cun Thiang Thlarau nih zumtu hna a peekmi laksawng lakah vanmi holh ai tel tim i Baibal ah a um lo. Vanmi zong nih atu i nan holhmi holhtheihlo hi kanmah holh pei asi cu an in ti bal hna maw? Vanmi zong nan hmu bal hna lo. Vanmi holh zong nan thei bal lo. Vanmi zong nih nan holhtheihlo hi kanmah holh asi an in ti hna lo buin nan lih in nan holhmi hi vanmi holh nan ti asi ahcun mitlau bak nan si ko lai.

7. Vami cu vancung ah an um caah vanmi holh cu vancung khua hmanmi holh asi lai. Vawlei cungah cunvawlei cung holh hi hman asi ve. Vawlei i na um chung ahcun (vancungmi hna he nan um tti hlan ahcun) vawlei cung minung holh in holh khawhnak kha Pathian nih an peek lai i vancung na phanh tik tu ah vacung khua holh in holh khawhnak cu Pathian nih a peek ve te lai. Vawlei cung i na nun lio ah vawlei pumpi nih a hmanmi English hmanh in thawngttha na chim khawh rih lo lio ah vancung khua holh kha na lih in cawng len hlah. Kan ram ai rawk dih cang lai hih.

Be the first to comment on "Dr. Aung Myint Thang nih “Holhtheihlo” asi khawh lonak fiang ngaiin a langhter than"

Leave a comment

Your email address will not be published.


*


Secured By miniOrange