Salai Lungthli Tum:MP Ka Tlin Ahcun ….

Ram le miphun sersiamnak hriamnam tha bik cu fimthiamnak a si. MP ka tlin ahcun keimah meehmun ah a ummi khuate sianginn vialte cachimhtu tlamtling an ngei maw timi ka zohfel hmasa lai. An ngeih khawhnak ding ah ka sining dihlak kaa zuam lai.

Khuahrang a si ah cun Khuahrang khuami kha cachimhtu caah rian pek a tha bik tiin ka ruah, Vawngtu ah cun Vawngtu khuami a tha bik ve. BA a ngahmi thengte a si lai timi ka cohlang lo, degree a ngei lo nain ca a thiam i dawtnak a ngeimi a si ahcun cachimhtu rian pek khawhnak ding kaa zuam lai.

𝑲𝒉𝒖𝒂𝒕𝒆 𝒔𝒊𝒂𝒏𝒈𝒊𝒏𝒏 𝒑𝒂𝒌𝒉𝒂𝒕 𝒂𝒉 𝑬𝒏𝒈𝒍𝒊𝒔𝒉 𝒈𝒓𝒂𝒎𝒎𝒂𝒓 𝒂 𝒄𝒉𝒊𝒎 𝒌𝒉𝒐𝒎𝒊 𝒑𝒂𝒌𝒉𝒂𝒕 𝒕𝒂𝒍 𝒂 𝒖𝒎 𝒉𝒓𝒊𝒎𝒉𝒓𝒊𝒎 𝒂 𝒉𝒂𝒖, 𝒄𝒐𝒛𝒂𝒉 𝒏𝒊𝒉 𝒂 𝒑𝒆𝒌 𝒌𝒉𝒂𝒘𝒉 𝒉𝒏𝒂 𝒍𝒐 𝒂𝒉𝒄𝒖𝒏 𝒌𝒆𝒊𝒎𝒂𝒉 𝒑𝒖𝒎𝒑𝒂𝒌 𝒑𝒉𝒂𝒊𝒔𝒂 𝒉𝒎𝒂𝒏𝒈 𝒊𝒏 𝒂 𝒇𝒊𝒕 𝒎𝒊 𝑬𝒏𝒈𝒍𝒊𝒔𝒉 𝒄𝒉𝒊𝒎𝒉𝒕𝒖 𝒌𝒂 𝒉𝒍𝒂𝒏 𝒕𝒆 𝒍𝒂𝒊.

Kawlholh le English an theih hlan te cu ngakchia theihmi holh in cachimh ding ka forh hna lai(cozah nih a duh lo). Nain, thiamsang i chuah khawhnak ding caah Kawlholh le English thiam hrimhrim a herh, hman lengmang a herh, mah le pengtlang holh in vawlei fimnak kutka hon khawh a si lo, English hi fimnak kutka i tawh a si timi an pemh khawhnak ding ka si khawh chung kaa zuam lai.

Laimi kar fawi deuh in i chawnh khawhnak cu Laiholh hi a si caah kan thiam cio ahcun a chiatnak a um lo, thahnemnak tampi a um timi zong an pemh khawhnak ding ka zuam chih lai. Cozah theihpinak lak lo zong in khuami nih duh ahcun cawn khawh a si ko, holh cawn ruang ah thongthlak a um hraw lai lo.

Lautu, Mara le Zophei holh zong kan thiam a herh i a tlau lo nak hnga kan kilven le kan dawt a herh timi biatak tein ka aupi fawn lai. Cun, thiamnak aa tel lomi by-heart system a tlau khawhnak ding ah biatak tein ka zuam lai. By-heart in cauk pakhat zah dih nakin lung i fian hnu ah ca tlangkhat thiam hmanh kha man a ngei deuh tuk timi an i fian khawhnak hnga chimrel le nunter ka zuam lai.

Hi ka saduhthah cu upadi ser theng zong a hau lem lo, mipi i zuamnak a um ahcun fawi tein tlamtlinter khawhmi a si.

Secured By miniOrange