Kan rampi zei tluk hmenh in buaibai ko hmenh seh law Hringtu Sunghno kan nu le upat pek nak ni cu i theih tar lo in na um kha hnga maw?Nu le Upat pek nak bia tawi.

Kawlram mipi hna hi uk nak chut mi ralkap tuah sar nak ruang ah fahnak, harnak tam pia a phunphun kan in kan tuar. Hitluk in canchia, cantha lo can pi a si ko na in hi vawlei cung har nak phunzakip vial te cu lu cung ah i khinh in nganfah nak nganpi tuar in hi vawlei ah a kan hring tu kan nu le upat peknak ni te hi cu philh awk a tha lo mi, upat peknak tuah lo awk a tha lo mi ni a si ko thiah ka ruah. Hringtu nu le cu kanmah le kanum nak cio, kanmah le kan ti khawh tawk cio, kanmah le kan can a rem ning cio in upat pek nak kanrak tuah cio nanrak tuah cio ko lai tiah ka zumh.

Hringtu sunghno kan nu le upat pek nak lang tar nak caah kei mah Philip Bawi Thang nih ka chim khawh tawk, ka lang tar khawh tawk te caa in ka rak lang tar ve lai.

Ahmasabik ah hringtu sunghno ka nu ka lawm tuk kan dawt tuk.Cun hringtuk nu le vial te le nun chimhhrin nak lei in si seh, fimtiam cawn nak ca lei in si seh a ken kip lo in a kan diar kamh pi tu, a kan zoh khenh tu, hringtu nu le dirhmun ah a dir mi nu le vial te nan dihlak in upat nak kan pek hna.

Zan nih tlai chin.
Tuar pi awk nih tha lo
Zantim khua mang hnu i harsat na tuar
Thlenhri pi nih ticin bang in
Hacang seh in ngan fah na tuar
Aho hmenh nih theih piak kawh lo
Sunghno ka nu nauhrin nganfah na rak tuar um
Na fa kei nih chanchung kum za
Cham khawh si lai lo
Sunghno ka nu na dawt nak cu
Kan biak Pathian cungzingnu nih
Thluauchuah bongmal zah he
Thluachuah nak in pe ko seh ti in
Zingnu sinah thlaza kan campiak ee Sunghno ka nu
Fale caah zohchunh awk tlak
Sunghno ka nu kan dawt tuk e, ka lawm tu ee.

Hivawlei ah kan rak sem khawh nak ding caah hin hringtu kan nu le nih hin harsat nak a phunphun hi an rak tuar. An fale an kan pawi lio ah hin an duh mi zong an tuah kho lo, an ei duh mi zong an rak ei ngam lo. Zeiruang ah ti ah cun a pawi lio mi a fa zawn a kan ruah caah hin a rak si. Thlakua chung fa le zawn ruat in har nak phunphun a rak tuar.

Cu lawng sirih loin a kan hrin dih hnu ah, ngakchiat lio in upat pi tuang ah hin hringtu nu tluk in fa le cung ah zawn ruat kho mi le harsat, ning zah nak a tuar ngam mi hi hringtu sunghno kan nu le hi an si peng rih thiamthiam.

Ka fadawt hawi hngar sual lai ti in thlenhri put, thazangdih ngai in chosang an kai, rianhrang an tuan. An thabat hmenh i hrim lo in ka fa dawt te tamhal sual lai ti in an hnuk thlum te an kan dinh. Pomphei kan si ka te in zahmenh ah thaten i hnilh thiam lo in hnukthlum a kan dinh, thlaza a kan campiak.Ka fa dawt hi hawi lo veseh ti in pacan ah a rak dir. Zei tik hmenh ah lahkah a ei bel lo mi sim um cu sunghno kan nu le hi an si.

Vawlei cung hmunzakip kan phak i, in thatha lo thatha in kan um ko zong ah hringtu sunghno nu he thlam chiate chung i nuam thlaimai in biaruah ti kha kan rak ngai, kan rak i nuam, kan han zong a rak ngam khun. Cucu Hringtu nu le dawt nak huuham cu a rak si.Vawlei cung rawlchuan thiam bik mi minung 100 nih meh thawthwa, buh thawthaw an chuan mi kan ei zong ah hringtu nu chuan rawl cu mi zei hmenh ni an tluk hrim lo. Ataw pemmi pakankor chung i buhcak, ngapih rawh le a kikdih cang mi anthorhang i tawih i kut tawl huaha lo in kan rakcawh i kan rak ei tawn mi rawl te kha a rak thaw khun ko. Vawlei cung minthang sibawi thiamthiam, nurse mimui dawhdawh, zia thatha zong nih zeitluk hmenh in kan cawng an kan zonhkhenh zong ah keimah, nangmah kan dam lo tik i a tha bik in a kan cawng hram tu,a kan zohkhenh tu cu hringtu kan nu le hi an si. Zei tluk na muichiat,na uu pat, na tar zong ah hringtuĀ  nu caah cun ngakchia, mi muidawt te na si peng rih. Cucu hringtu nu le nih fa le cung i a kan dawt nak cu a si. Hring tu nu le dawt nak hi thih tiang chamkhawh ni um ti lai lo. Hi caa te hin hringtu nu le vial te nan dih lak in upat nak ka rak in pek hna.

Sunghno ka nu na dawh khun ko ee
Na fa kei caah Sunghno nu le na lonh dih hna
Na dawt nak sung cu fa le nih cham kawh si lai lo
Maw ka nu aww cungzing nu nih
Nun khua sau nak thluachuah nak in pe ko seh..

Crd-Pastor Thang Chum Lian

A tang lei Link hi rak Hmet law Pastor Thang Chum Lian nih hla a phuah mi (Sunghno ka Nu ti mi hla te hi rak ngaih ve ding in kan sawm hna.

Video Link : https://www.youtube.com/watch?v=LVIGnwkgCu8

Crd-Philip Bawi Thang