Vakok Bantuk In Kan I Daw Taktak Maw?

 

Vakok Bantuk In Kan I Daw Maw?

Laimi Kan Hmelchunhnak asi mi Vakok Kong Tlawmpal tein kan van langhter mi asi.

Dawtnak le remhnak, zumh awktlak mi sinak, Duh dawtmi cungah tuanvo lak ngamnak ti bantuk he pehtlai in Laimi nih hmelchunhnak ah kan hman mi Vakok nunnak ah mah bantuk hna kha kan hmuh khawh dihmi asi.

Vakok hi va vialte lakah ai phundang ngaingai mi an si. A ruang tampi ruangah a pasal a thih ahcun a nupi zong a pasal hnu a zul ve tawn. Asilo ah vakok nu asilo ah vakok pa nih zumhawk tlak lo in a um timi lunghrinhnak a ngeih tikah a mah le a mah ai that tawn, pakhat le pakhat cungah dawtnak an ngei mi kha an nunnak tiang pek in zumhawk tlak an si nak kha an langhter.

Cun an i phundang ngai nak a dang pakhat cu Va dang bantuk in a pa nih duh paoh in va nu dang sinah nuamhnak tuah a hmang mi an si lo. Vakok a nu le a pa an i duh dawt asi ahcun an pahnih in thih hlan lo tiang zumhawk tlak tein hmunkhat ah an umti. cun Vakok nu nih fa ngeih ai timh tikah  thinkung chungah khua an ser i, cuka ah vakok nu nih thingkua kha a hmur tlum te lawngin a on i, Vakok pa nih a nupi fa a ngeih hnu in a fa le kal le zuan an thiam tiang zumhawk tlak tein an herhmi ti rawl in a cawm hna.

Vakok hi hmunkhat ah a bu in an um i, cu an bu chungin vakok pa le vakok nu pakhat le pakhat an i duh dawt asi ah cun, an bu chungin an chuak i a dang tein an mah pahnih te lawng inndang an chuak i khua a sa mi an si. Cu ti cun hmunkhat te ah an kalti, an ei ti, an dingti, a ihti mi an si.

Van chiat ah ram vai nih a pasal asilo ah a nupi pakhat paoh an thah sual asi ah cun, a tangmi vakok nih a sang khawh chung sang in van ah zuang in vawlei ah an mah le an mah thihlak in ai that tawn. Cu ruangah Vakok hi vadang he an i phundang nak asi i, khuaruahhar va timi cazin ah ai tel mi Va phunkhat an si nak zong asi.

Va tam deuh cu a pa nih a nu sinah nuamhnak a tuah dih hnu ah, a pa nih a kal tak theo tawn, cu tikah a nu kha naupawi bu in an chiah tak theo tawn i har nak tampi zong an tong theo. Va nu nih an ti an tit, an keuh, an fale caah mah tein rawl kawl ahau, rawl an kawl kar ah an fale caah thingpang ngai in an um, cu tikah harnak tam ngai an tong tawn.

Asinain va dang bantuk in Vakok cu an si lo, pakhat le pakhat an i duh dawt hnu cun khawika an kal paoh ah an i zul peng, then lo tein hmunkhat ah an um peng.  Vakok pa nih a nupi, a fale pawcawmnak dingah hechat in rian a tuan mi asi.

Vakok nu nih ti tit ai timh tikah hmunkhat te ah thingkua an kawlti, Vakok pa nih a nupi nau a pawi cang ti a theih tikah tha tein a zohkhenh, a duhmi paoh a tuahpiak dih, zan an ih tikah Vakok pa a thla tang te ah Vakok nu nih alu chia bu in a ih ter. Zei tluk in dah Vakok pa nih a nupi a dawt ti mi cu hmuhkhawh asi ko.

An um nak ding thingkua cu rem tein an tuah, a chunglei a rem maw rem lo tiah vakok nu nih thinghnah siseh a dangdang a herh mi kha ruang tein a tuah dih hna, cu tuahnak dingah a herh mi thilri pawl kha vakok pa nih hmundang ka dangah a va kawl i, a rak put cia mi paoh kha vakok nu nih dawh te le rem tein a rak tuah hna.

Cun Vakok nu nih thingkua chungah a lut i, thingkua phihnak dingah vakok pa nih thilri a herhmi tete kha a kawl rih, thingkua kha vakok pa nih a phih hna i, vakok nu a hmur tlum fangfang in a kua a nganh. Vakok nu zong chuak kho lo ding in le vakok pa zong a chungah lut kho lo dingin an tuah, vakok nu nih fa a ngeih hlan lo mah ti khan vakok pa nih a nupi caah rawl a kawl piak peng (hmanthlak chungah kan hmuh mi bantuk kha asi)

Vakok nu fa a ngeih hlan lo vakok pa nih ti le rawl in a zohkhen, fa a ngeih hnu zongah a nupi caah siseh, a fale caah siseh vakok pa nih ti le rawl an herhmi paohpaoh a kawlpiak hna. Vakok pa nih nikhat voi 60 in voi 70 tiang a nupi um nak hmun ah a rak veh lengmang ti si, vakok pa nih zeitluk in dah a nupi a dawt ti cu ruah ve ko.

Vakok pa nih ka um lo kar ah ka nupi hi va dang nih rawl hna an pek sual maw, ti hna an rak dinh sual maw ti theihnak dingah chinhchiahnak an tuah ti si.

Cu ve bantuk in Vakok nu nih lengah a um mi a pasal rawl a kawl nak in a rauh deuh sual si ahcun, Vakok nu kha a thinphang i, ka pasal hi vakok nu dang he maw an i nuam le si hnga tiah lungkuai ngai in a um tawn, cu tikah vakok pa nih a nupi sin a rat tikah caan hman tein a phan peng ti si. Cu vakok pa nih a nupi um nak ah chinchiahnak a tuah mi ai rawk maw rawl lo tiah nichiar a zoh peng…. ai rawh sual asi ah cun a nupi cu rawl zong a rak pek duh ti lo, ti zong a rak dinh duh ti lo, cu lawng si loin a mah le a mah ai that tawn ti si.

Vakok pa nih nikhat ah voi 60 in voi 70 tiang a nupi rawl a rak pek lengmang mi cu a caah harnak le lungrawhnak zei hmanh um loin lungtho te le thanuam tein fa a ngeih tiang a tuah peng. Vakok nu nih fa a ngeih i a caan a zatik ah thingkua cu an pahnih tein an bauhti i vakok pa nih vakok nu a zoh tikah a zangfak ngai.

A ruang cu Vakok nu kha nau a ngeihnak ah a hmul pawl an pong dih i, ngakchia bantuk in thla tampi zuang kho lo in a um, cu tikah vakok pa nih zei hmanh lungdong lo in a nupi le a fale zuan an thiam tiang ti le rawl in a cawm peng rih hna.

Dawtmi u le nau hna Laimi nih kan hmelchunhnak ah kan hman mi Vakok nunzia hi tuchan kan nunnak ah hmuh awk a har ngaingai mi asi cang. Vakok bantuk nuzia kan ngeih in pakhat le pakhat kar ah zumhawk tlak le dingfel tein kan um caan a cu cang lo maw. Hlan lio kan pi kan pu hna nih zei ruangah dah vakok hi an hmelchunhnak ah an hman tiah cun Zumhawk tlak nun an ngeih mi ruangah dawh asi. Tuchun Laimi tampi cu pakhat le pakhat ai zum ngam lo mi kan tam tuk cang. Vakok nih zumhawk tlak tein a nun bantuk in kan nih zong nih kan hmelchunhnak asi mi vakok bantuk in zumhawk tlak nun in nun i zuam ve hna usih.

 

 

Be the first to comment on "Vakok Bantuk In Kan I Daw Taktak Maw?"

Leave a comment

Your email address will not be published.


*