North Korea Nih Hriamnam Thar Hneksaknak Pakhat An Tuah Than

North Korea Nih Hriamnam Thar Hneksaknak Pakhat An Tuah Than

North Korea cozah nih ngeihmi thawngzamhnak KCNA nih missile thar pakhat hneksaknak kan tuah tiah an langhter, cu hneksaknak an tuahmi cu zeibantuk dah asi timi fiang tein an langhter lo nain thazang a thawng ngaingai mi missile pakhat asi tiah an langhter.

 

North Korea hruaitu Kim Jong Un le American president Donald Trump cu Vietnam khuapi Hanoi ah ton biaruahnak an rak ngeih mi tlamtling lo pi in a um hnu ah North Korea nih a voikhat nak an hriamnam hneksaknak langsar ngai in an tuah hi asi.

Aluancia mi zarh chungah Kim Jong Un nih a chim mi cu Donald Trump nih tonbiaruahnak kan ngei mi ah a dikmi lungthin ngei ding a herh taktak tiah a rak chim bal hnu ah, tu bantuk in missile thar hneksaknak an tuah hi asi. cu bantuk hriamnam hneksaknak an tuah mi ah Kim Jong Un pumpak hrimhrim nih a va zoh hna tiah KCNA  nih an langhter, cu hriamnam thar an hneksak mi ah ai phundang ngaimi system ai tel i phun tampi in hman khawhmi asi tiah theih asi.

Cu bantuk hriamnam hneksaknak an tuah mi cungah Kim Jong Un nih a chim mi cu North Korea ralkap raltuk nak lei ah zeitluk in dah kan lianh ngan i kan sang ti mi a langhter tu asi tiah KCNA nih an langhter, asinain zeibantuk missile dah a si timi balte an langhter lo. Aluancia zarh ah khan cutuh (ၿဂဳိလ္တု) hmanthlaknak in an hmuh khawh mi cu North Korea ram nih abiapi in nuclear hriamnam hneksaknak an tuahnak hmunhma hrawng ah cawlcang nak tete a um tiah an hmuh khawh.

Ref: Channel B Media Group

Be the first to comment on "North Korea Nih Hriamnam Thar Hneksaknak Pakhat An Tuah Than"

Leave a comment

Your email address will not be published.


*